Пĕтĕм тĕнчери тăван чĕлхе кунне 2000 çултанпа палăртатпăр. Ăна ЮНЕСКОн Генеральнăй конференцийĕн 30-мĕш сессийĕнче йышăннă. Çак организаци пĕлтернĕ тăрăх, пурĕ 7 пин те 97 чĕлхе Çĕр чăмăрĕ çинче. Вĕсенчен 70% çывăх вăхăтра çухалма пултарать.
Халăх шучĕпе пирĕн тăван чĕлхе Раççейре пиллĕкмĕш вырăн йышăнать. Планета çинчи халăх ытларах 13 чĕлхепе усă курать. Чи анлă сарăлни вăл – китай чĕлхи. Пирĕн çĕр-шывра вара – вырăс. 2010 çулхи çыру тăрăх, чăвашсем пурĕ 1миллион та 400 пин шутланать. Халăх шучĕ миллионран иртсен ăна йышлă, аслă халăхсен картине кĕртеççĕ. Чăваш чĕлхи те çак пин-пин чĕлхе шутĕнче сăваплă, ырă ятлă.
Пирĕн тăван чĕлхе- чăваш чĕлхи, вăл атте-анне пекех пĕрре. Чăваш юманĕ пек ватă та патвар. Геннадий Волков этнопедагог калашле, «чухăн мар вăл: пуян та, чаплă та, çемçе те, вутлă та, хăватлă та…»
Чăваш чĕлхи – пирĕн халăхăн ĕмĕр сӳнми ăс-тăн чечекĕ. Халăх ăна темиçе ĕмĕр хушши аталантарнă, якатнă. Вăл янăравлă та, асамлă та.
Тăван чĕлхе кунне халалласа Çĕмĕрле хулин пĕтĕмĕшле вăтам пĕлу паракан 6-мĕш шкулăн 4-мĕш класĕнче «Ман тăван чĕлхе» викторина иртрĕ.